Estatutos

CAPÍTULO I

DENOMINACIÓN, FINS, DOMICILIO E ÁMBITO

Artigo 1º - Coa denominación “Asociación Internacional de Estudos Galegos / International Association of Galician Studies (AEIG)” constituíuse unha ASOCIACIÓN, arestora ao abeiro da Lei Orgánica 1/2002, de 22 de marzo, e normas complementarias, con personalidade xurídica e plena capacidade de obrar, carecendo de ánimo de lucro.

Artigo 2º - Esta Asociación constituíuse por tempo indefinido.

Artigo 3º - A AIEG persegue exclusivamente obxectivos de utilidade xeral. A súa existencia ten como fins:

  1. Promover os estudos galegos a nivel internacional.
  2. Propiciar o intercambio entre as/os estudosas/os das diversas disciplinas que se ocupan da realidade galega.
  3. Fomentar a presenza da cultura galega no mundo, especialmente no ámbito académico.

Artigo 4º - Para o cumprimento destes fins, a AIEG promove a organización dun congreso internacional e a edición dun boletín informativo e doutras publicacións, tanto impresas como electrónicas, que se xulguen convenientes.

Artigo 5º - A Asociación establece o seu domicilio social non Consello da Cultura Galega, Pazo de Raxoi, 2º andar, D.P.15705 Santiago de Compostela, Galicia; e o seu ámbito territorial, no que vai realizar principalmente as súas actividades, comprende todo o territorio do Estado, así como o eido internacional académico.

CAPÍTULO II

ÓRGANOS DE GOBERNO E REPRESENTACIÓN

Artigo 6º - Os órganos de goberno da AIEG son a/o Presidenta/e, a Xunta Directiva e a Asemblea Xeral.

A Asociación será xestionada e representada por unha Xunta Directiva constituída por un/ha Presidenta/e, un/ha Vicepresidenta/e, un/ha Secretario/a, un/ha Tesoureira/o, un/ha Secretaria/o de Relacións Institucionais e catro Vogais. Estes cargos serán designados e revocados pola Asemblea Xeral, e o seu mandato terá unha duración de tres anos. A válida constitución da Xunta Directiva require a presenza de polo menos a terceira parte dos seus membros.

Artigo 7º - Facultades da Xunta Directiva. Correspóndelle á Xunta Directiva a xestión ordinaria e a actividade executiva da Asociación nos períodos comprendidos entre as sesións da Asemblea Xeral. Os acordos da Xunta Directiva adóptanse por maioría simple. Son facultades particulares da Xunta Directiva:

  1. Dirixir as actividades sociais e levar a xestión económica e administrativa da Asociación, acordando realizar os oportunos contratos e actos.
  2. Executar os acordos da Asemblea Xeral.
  3. Formular e someter á aprobación da Asemblea Xeral os Balances e Contas anuais.
  4. Resolver sobre a admisión de novos asociados.
  5. Nomear delegada/os para algunha determinada actividade da Asociación.
  6. Calquera outra facultade que non sexa da exclusiva competencia da Asemblea Xeral de socias/os.

Artigo 8º - Funcións dos membros da Xunta Directiva:

  1. Correspóndelle á/ao Presidenta/e:
    • a.1. Elaborar coa Xunta Directiva a orde do día das sesións.
    • a.2. Convocar, presidir e pechar as sesións da Xunta Directiva e da Asemblea Xeral, así como dirixir as deliberacións dunha e doutra.
    • a.3. Decidir, se fose preciso, co seu voto de calidade a orientación dunha determinada decisión.
    • a.4. Representar legalmente a Asociación en calquera das súas actividades, perante toda clase de organismos públicos ou privados.
    • a.5. Supervisar e autorizar as actuacións que de ordinario lles correspondan a outros membros nos casos en que así o dispoñan os Estatutos.
    • a.6. Ordenar pagos e autorizar coa súa firma os documentos, actas e correspondencia.
    • a.7. Adoptar calquera medida urxente que a boa marcha da Asociación aconselle, ou no desenvolvemento das súas actividades resulte necesaria ou conveniente, sen prexuízo de dar conta posteriormente á Xunta Directiva.
  2. Correspóndelle á/ao Vicepresidenta/e substituír a/o Presidenta/e en todas as súas funcións por razón de enfermidade ou calquera outra causa xusta, ou cando este delegue as súas funcións por un tempo determinado.
  3. Correspóndelle á/ao Secretaria/o levantar acta das sesións, así como dirixir os traballos puramente administrativos da Asociación. Expedirá certificacións, levará os libros da Asociación legalmente establecidos e o ficheiro de asociados, e custodiará a documentación da entidade, facendo que se cursen as comunicacións sobre designación de Xuntas Directivas e demais acordos sociais inscribibles aos Rexistros correspondentes, así como o cumprimento das obrigas documentais nos termos que legalmente correspondan.
  4. Correspóndelle á/ao Tesoureira/o:
    • d.1. Recadar e custodiar os fondos pertencentes á Asociación.
    • d.2. Realizar os pagos que lle ordene a/o Presidenta/e.
    • d.3. Propoñerlle á Xunta Directiva todas as cuestións referentes á mellora e ordenación da actividade económica da Asociación.
  5. Correspóndelle á/ao Secretaria/o de Relacións Institucionais o referente á divulgación do coñecemento da Asociación e o establecemento de vínculos con institucións e outras asociacións que teñan fins semellantes á AIEG.
  6. As/Os Vogais terán as obrigas propias do seu cargo como membros da Xunta Directiva, así como as que nazan das delegacións ou comisións de traballo que a propia Xunta lles encomende.

Artigo 9º - Elección da Xunta Directiva. A Xunta Directiva será elixida por un período ordinario de tres anos pola Asemblea Xeral, entre as candidaturas presentadas perante os organismos constituídos cun mes de antelación á sesión da Asemblea. As candidaturas presentaranse por escrito perante a Xunta Directiva en funcións. As candidaturas deben facer constar os cargos que se propoñen e achegar un escrito de aceptación asinado polo candidato.

Despois de debater a proposta ou propostas de Xunta Directiva, terá lugar a votación. Para a elección requírese o voto favorable da maioría absoluta dos membros presentes. Se ningunha candidatura acada esa porcentaxe, terá lugar unha segunda votación na que abondará o voto favorable da maioría simple.

Todos os cargos directivos poden ser reelixidos con excepción da/o Presidenta/e. As vacantes que se puidesen producir durante o mandato de calquera dos membros da Xunta Directiva serán cubertas provisionalmente entre os devanditos membros ata a elección definitiva pola Asemblea Xeral convocada ao efecto.

CAPÍTULO III

ASEMBLEA XERAL

Artigo 10º - A Asemblea Xeral é o órgano supremo de goberno da Asociación e estará integrada por toda/os a/os asociadas/os. Compételle á Asemblea Xeral definir os programas de traballo, elixir a Xunta Directiva, fixar a cota dos membros e resolver sobre o informe da/o Presidenta/e, da/o Secretaria/o e da/o Tesoureira/o.

Artigo 11º - As reunións da Asemblea Xeral serán ordinarias e extraordinarias. As Asembleas Xerais, tanto ordinarias como extraordinarias, quedarán validamente constituídas en primeira convocatoria se concorre máis da metade dos membros da Asociación. De non conseguirse ese quórum, a Asemblea quedará constituída en segunda convocatoria media hora más tarde, calquera que sexa o número de membros que comparezan.

Artigo 12º - A sesión ordinaria da Asemblea Xeral terá lugar canda o congreso internacional patrocinado pola Asociación. Convocaranse sesións extraordinarias cando os intereses da Asociación así o esixan ou por solicitude escrita e motivada que se dirixa á Xunta Directiva e que estea subscrita polo menos pola décima parte dos membros da Asociación.

Artigo 13º - As sesións da Asemblea Xeral son convocadas pola/o Presidenta/e ou, por imposibilidade de esta/e, pola/o Vicepresidenta/e mediante carta ou circular dirixida a todos os membros, na que se anunciará o lugar, a data e a orde do día da sesión, con expresión concreta dos asuntos que se van tratar. A convocatoria deberá realizarse cunha antelación de polo menos trinta días naturais.

Artigo 14º - Desenvolvemento das sesións da Asemblea Xeral e votacións:

  1. A/O Presidenta/e, ou no seu defecto a/o Vicepresidenta/e, dirixirán as sesións. En caso de imposibilidade de ambos, a Asemblea elixirá un moderador.
  2. A Asemblea Xeral pode modificar a orde do día da sesión ordinaria por unanimidade dos membros presentes.
  3. Os acordos da Asemblea Xeral adóptanse, como norma xeral, por maioría simple das personas presentes ou representadas cando os votos afirmativos superen os negativos, non sendo computables a estes efectos os votos nulos, en branco, nin as abstencións. As votacións realizaranse, en principio, a man alzada pero serán secretas por solicitude de calquera membro cando se trate dunha decisión referida á elección de persoas.
    Será necesaria maioría cualificada das persoas presentes ou representadas, que resultará cando os votos afirmativos superen a metade destas, para:
    • c.1.) Disolución da entidade.
    • c.2.) Modificación dos Estatutos.
    • c.3.) Disposición ou alleamento de bens integrantes do inmobilizado.
  4. Poderase efectuar o voto por correo para a elección da Xunta Directiva sobre a lista de candidatos enviada coa convocatoria da sesión da Asemblea Xeral. Neste caso, o voto deberase dirixir por escrito ao presidente da AIEG con a antelación suficiente para que o reciba antes do comezo da sesión.
  5. Os membros que asistan ás sesións da Asemblea Xeral poderán exercer o dereito de voto en representación dun máximo de tres membros ausentes. As delegacións de voto deberanse dirixir por escrito á/ao presidente da AIEG coa antelación suficiente para que as reciba antes do comezo da sesión.
  6. Os acordos adoptados pola Asemblea Xeral rexistraranse nunha acta, na que se fará constar o lugar, a data e a hora das sesións, un resumo do debate e o resultado das votacións. A acta será asinada pola/o Secretaria/o e pola/o Presidenta/e da AIEG.

Artigo 15º - Son facultades da Asemblea Xeral:

  1. Aprobar a xestión da Xunta Directiva.
  2. Examinar e aprobar as contas anuais.
  3. Elixir os membros da Xunta Directiva.
  4. Fixar as cotas ordinarias o extraordinarias.
  5. Disolución da Asociación.
  6. Modificación dos Estatutos.
  7. Disposición ou alleamento dos bens.
  8. Calquera outra que non sexa competencia atribuída a outro órgano social.

Artigo 16º - Requiren acordo da Asemblea Xeral Extraordinaria convocada ao efecto:

  1. Modificación dos Estatutos.
  2. Disolución da Asociación.

CAPÍTULO IV

RÉXIME ECONÓMICO

Artigo 17º - Os recursos económicos da AIEG proveñen de:

  1. As achegas do seus membros mediante cotas.
  2. As doazóns e subvencións que poida recibir.
  3. Calquera outro recurso lícito.

A Asociación constitúese cun patrimonio inicial de seis mil euros e non se prevé superar a cantidade de sesenta mil euros no orzamento anual. A Xunta Directiva proporalle á Asemblea Xeral a aprobación do orzamento e na mesma sesión renderá contas da xestión do exercicio anterior. A Asemblea poderá designar un interventor imparcial que informe sobre os resultados da inspección de contas. A modificación da cota dos membros da AIEG é competencia da Asemblea Xeral e require o voto favorable de dúas terceiras partes dos presentes na sesión.

CAPÍTULO V

MEMBROS DA ASOCIACIÓN

Artigo 18º - Pode ser membro da AIEG calquera persoa natural ou xurídica con capacidade de obrar e en pleno exercicio dos seus dereitos civís que acepte os obxectivos fundamentais da Asociación segundo establece o Artigo 3 destes Estatutos.

Artigo 19º - Os membros da AIEG poden ser de pleno dereito ou de honra. Son membros de honra da AIEG aquelas persoas ás que a Asemblea Xeral da Asociación lles recoñeza esa condición en atención aos seus méritos. Os membros de honra, non sendo que teñan asemade a condición de membros de pleno dereito, carecen do dereito de voto nas sesións da Asemblea Xeral.

Artigo 20º - Os membros da AIEG poden abandonar a Asociación en calquera momento mediante escrito dirixido ao Presidente da Asociación. A Xunta directiva pode decidir a expulsión dun membro no caso de que este prexudique gravemente os intereses da Asociación ou non pague a súa cota. O interesado ten dereito a recorrer perante a propia Xunta Directiva no prazo dun mes e sobre este recurso decidirá a Asemblea Xeral na primeira sesión en que se reúna.

Artigo 21º - Son dereitos básicos dos membros:

  1. Participar nas deliberacións dos distintos órganos en que estean integrados e, no caso dos membros de pleno dereito, nas votacións correspondentes.
  2. Elixir e ser elixidos para os cargos da Xunta Directiva ou de calquera outra comisión da Asociación que se poida establecer.
  3. Recibir información sobre os acordos adoptados polos órganos da Asociación.
  4. Participar nas actividades que se organicen en conformidade coas funcións e obxectivos que aprobe a Asociación.

Artigo 22º - Son deberes básicos dos membros:

  1. Participar coas súas cotas no financiamento da Asociación. As cotas satisfaranse anualmente.
  2. Respectar e colaborar no cumprimento das decisións tomadas polos órganos da Asociación, sen mingua do dereito a impugnar os acordos e resolucións que ao seu xuízo non se axusten a dereito ou a estes Estatutos.
  3. Asistir ás Asembleas e demais actos que se organicen.
  4. Desempeñar, no seu caso, as obrigas inherentes ao cargo que ocupen.

CAPÍTULO VI

DISOLUCIÓN

Artigo 23º - A Asociación pódese disolver polas seguintes causas:

  1. Por acordo adoptado coo voto favorable de nove décimas partes dos membros en sesión extraordinaria da Asemblea Xeral convocada para o efecto, e consonte o disposto no Artigo 16 dos presentes Estatutos.
  2. Polas causas que prevé o Artigo 39 do Código civil.
  3. Por sentenza xudicial firme.

Artigo 24º - Na sesión na que se decida a disolución da Asociación resolverase sobre a liquidación do seu patrimonio, o alleamento de bens, saldo de débedas e reintegración dos créditos.

Artigo 25º - Realizadas as operacións mencionadas non apartado anterior, doarase o líquido resultante a algunha ou algunhas asociacións do mesmo tipo e finalidade que a AIEG e preferentemente a que se constitúa, se é o caso, en substitución dela.

CAPÍTULO VII

INTERPRETACIÓN E MODIFICACIÓN DOS ESTATUTOS

Artigo 26º - A interpretación destes Estatutos correspóndelle á Xunta Directiva da AIEG e os acordos que se adopten sobre esta materia requiren o voto favorable de dúas terceiras partes dos membros que constitúen o devandito órgano. Os membros da Xunta Directiva desconformes coa interpretación aprobada poden recorrer contra esta perante a Asemblea Xeral mediante escrito motivado que deberán presentarlle á Xunta Directiva no prazo dun mes desde que se adoptou o devandito acordo.

A modificación destes Estatutos, tal como se explicita no seu Artigo 16, é competencia da Asemblea Xeral da AIEG convocada en sesión extraordinaria para o efecto. O acordo require o voto favorable de tres cuartas partes dos membros presentes.

DISPOSICIÓN ADICIONAL

En todo canto non estea previsto nos presentes Estatutos aplicarase a vixente Lei Orgánica 1/2002, de 22 de marzo, reguladora do Dereito de Asociación, e as disposicións complementarias.